Xəbərlər

ETİHİ üzvləri Müəllimlərin XXII Yay İdman Oyunlarını 6 medalla başa vurublar

Bolqarıstanın Albena şəhərində keçirilən Müəllimlərin XXII Yay İdman Oyunlarına yekun vurulub.

Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirak etdiyi beynəlxalq yarışlarda Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqının (ETİHİ) təmsilçiləri uğurlu nəticələr əldə ediblər.

ETİHİ təmsilçiləri yarışları 4 birincilik və 2 üçüncülük olmaqla, ümumilikdə 6 mükafatla başa vurublar.

Mini-futbol üzrə komandamız final görüşündə Polşa təmsilçisini 5:4 hesabla məğlub edərək turnirin qalibi olub.

Stolüstü tennis üzrə komanda yarışlarında qadınlardan ibarət komandamız 1-ci, kişilərdən ibarət komandamız isə 3-cü yeri tutub.

Qadınlar arasında stolüstü tennis üzrə fərdi yarışda Nizami rayonu 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbinin məşqçi-müəllimi Rüfət Əliyeva 1-ci, Xətai rayonu 56 saylı tam orta məktəbin müəllimi Xəyalə Qiyasova isə 3-cü yeri tutub. Şahmat üzrə fərdi yarışda isə Şəmkir rayonu Kimya və Biologiya Təmayüllü Liseyinin müəllimi Bünyad Əsgərov 1-ci yerə layiq görülüb.

Sonda qaliblər Bolqarıstan Müəllimlər Birliyinin prezidenti Yanka Takeva, Bolqarıstan Müstəqil Həmkarlar İttifaqları Konfederasiyasının vitse-prezidenti Todor Kapitanov, Bolqarıstan İşçilərinin İdman və Sağlamlıq Federasiyasının prezidenti, Balkan İşçi İdmanı Assosiasiyasının vitse-prezidenti Desislava Yagodin və Varna şəhərinin meri Blagomir Kotsev tərəfindən kubok və medallarla təltif olunublar.

Beynəlxalq yarış təhsil işçiləri arasında sağlam həyat tərzinin təşviqində, eləcə də həmkarlar ittifaqı üzvləri arasında dostluq və əməkdaşlıq əlaqələrinin inkişafında mühüm rol oynayır.

Qeyd edək ki, 2004-cü ildən etibarən keçirilən bu yarışlarda Ümummilli Lider Heydər Əliyevin anadan olmasının ildönümünə həsr olunmuş respublika idman yarışlarında yüksək nəticələr göstərərək seçilmiş ittifaq üzvləri iştirak edirlər.

ETİHİ üzvləri Müəllimlərin XXII Yay İdman Oyunlarında uğurla çıxış edirlər

Bolqarıstanın Albena şəhərində Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirakı ilə Müəllimlərin XXII Yay İdman Oyunları keçirilir.

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqının (ETİHİ) üzvləri də bu beynəlxalq yarışlarda iştirak edirlər.

Azərbaycan təmsilçiləri mini-futbol, stolüstü tennis, basketbol, çimərlik voleybolu və şahmat olmaqla 5 idman növündə mübarizə aparırlar.

Avqustun 27-28-də keçirilən yarışlarda ittifaq üzvlərimiz bir sıra uğurlu nəticələr əldə ediblər.

Mini-futbol üzrə komandamız qrup mərhələsini 6 xalla başa vuraraq yarımfinala yüksəlib. Yarımfinalda Bolqarıstanın “Vraça” komandasını 3:1 hesabı ilə məğlub edən təmsilçilərimiz finala vəsiqə qazanıblar.

Stolüstü tennis üzrə qadın və kişi komandalarımız da qrup mərhələsində keçirdikləri bütün qarşılaşmalarda qələbə qazanıblar. Qadınlardan ibarət komandamız 6 xalla, kişilərdən ibarət komandamız isə 8 xalla qrup mərhələsini lider kimi başa vuraraq final mərhələsinə yüksəliblər.

Şahmat üzrə fərdi yarışlarda Şəmkir rayon Kimya-biologiya təmayüllü liseyin müəllimi Bünyad Əsgərov I yeri tutub. O, həlledici qarşılaşmada Polşanın “ZNP” komandasının təmsilçisinə qalib gələrək yarışın qalibi olub.

Qeyd edək ki, Müəllimlərin Yay İdman Oyunları 2004-cü ildən etibarən ənənəvi olaraq hər il Bolqarıstanda keçirilir. Oyunlarda Ümummilli Lider Heydər Əliyevin anadan olmasının ildönümlərinə həsr edilən ölkədaxili idman yarışlarında yüksək nəticələr göstərərək münsiflər heyəti tərəfindən seçilən ittifaq üzvlərimiz iştirak edirlər.

Yarışlar avqustun 30-dək davam edəcək.

26 -27 avqust tarixində İsmayıllı rayonlarında təhsil işçilərinin ənənəvi sentyabr konfransı keçirilib.

26 -27 avqust tarixində İsmayıllı rayonlarında təhsil işçilərinin ənənəvi sentyabr konfransı keçirilib. Konfransda Dağlıq Şirvan Təhsil İdarəsinin müdir müavini Rahim Novruzov, Yeni Azərbaycan Partiyası İsmayıllı rayon təşkilatının sədri Zaur Muradov, Tədrisin keyfiyyəti sektorunun müdiri Cəmil Muradov, İsmayıllı rayonu üzrə təhsil sektorunun müdiri Rəşid Məmmədov, İsmayıllı Rayon İcra Hakimiyyətinin əməkdaşı Gülnarə Mirzəliyeva, ETİHİ İsmayıllı Rayon Komitəsinin sədri Hafiz Kərimov, təhsil müəssisələrin rəhbərləri, onların müavinləri, qabaqcıl müəllimlər və digər təhsil işçiləri iştirak ediblər.

Konfransda çıxış edən Dağlıq Şirvan Regional Təhsil İdarəsinin müdir müavini yeni tədris ilinin başlanması münasibətilə təhsil işçilərini təbrik edib, onlara gələcək fəaliyyətlərində uğurlar arzulayıb.

Keçirilən konfranslarda IV və VI siniflər üzrə aparılan monitorinqlərin, həmçinin IX və XI siniflər üzrə buraxılış imtahanlarının nəticələri ətraflı təhlil olunub. Konfransın 2-ci günü məktəb rəhbərləri, müavinlər, ilk həmkarlar ittifaqı təşkilat sədrləri, kitabxanaçılar , psixoloqlar və fənlər üzrə metodbirləşmə sədrlərilə aparılan panel müzakirələrdə tədris ilində rastlaşmış problemlər və qarşıda duran vəzifələr müəyyənləşdirilmişdir. ETİHİ Rayon Komitəsinin sədri çıxış edərək təhsil işçilərinin asudə vaxtını və istirahətini səmərəli keçirilməsində ottifaq üzvlərinə sanatoriya və istirahət evlərinə yollayışların verilməsində dəstək olduğuna görə Elm və Təhsil İşçiləri Həmkarlar İttifaqı Respublika Komitəsinə minnətdarlığını bildirmişdir. 

 Konfransda çıxış edənlər yeni tədris ilində təlimin keyfiyyətinin artırılması və qarşıda duran prioritet vəzifələrin icrası istiqamətində görüləcək işlərdən bəhs etdilər.

N.Behdiyev adına şəhər 6 nömrəli tam orta ümumtəhsil məktəbində çalışmanın son yaş həddinə çatmış texniki işçisi Mirzəyeva Sahilə Arif qızının 65 illik yubiley tədbiri keçirilmişdir.

Bu gün ETİHİ İsmayıllı Rayon Komitəsinin üzv təşkilatı olan N.Behdiyev adına şəhər 6 nömrəli tam orta ümumtəhsil məktəbində çalışmanın son yaş həddinə çatmış texniki işçisi Mirzəyeva Sahilə Arif qızının 65 illik yubiley tədbiri keçirilmişdir. 

Tədbirdə ETİHİ İsmayıllı Rayon Komitəsinin mühasibi Musa Qədirov,məktəbin direktoru Ağakərim İskəndərov və texniki heyət iştirak ediblər. Yubilyar haqqında çıxış edən natiqlər Sahilə xanımın işinə çox məsuliyyətlə yanaşdığını və öz səmimiliyi ilə kollektivin dərin hörmətini qazandığını vurğulayıblar. 

 Məktəbin texniki işçisi Mirzəyeva Sahilə Arif qızının 65 illik yubiley yaşının tamam olması münasibətilə ETİHİ İsmayıllı Rayon Komitəsinin fəxri fərmanı və qiymətli hədiyyəsi ilə təltif olundu.Bütün təhsil ictimaiyyəti adından təbrik edir, ona sağlam ömür və xoş istirahət arzulayırıq.

İsmayıllıda “Coke Studio Festival” böyük coşqu və yüksək əhval-ruhiyyə ilə keçirildi.

İsmayıllıda “Coke Studio Festival” böyük coşqu və yüksək əhval-ruhiyyə ilə keçirildi.

Musiqi və əyləncənin bir araya gəldiyi festival axşamı rayon sakinləri və qonaqlar üçün xoş istirahət məkanı, eyni zamanda İsmayıllının turizm imkanlarının təqdimatı baxımından gözəl fürsət oldu.

Bu gözəl tədbirin təşkilinə və İsmayıllıda keçirilməsinə görə Xəzər TV və Coca-Cola kollektivlərinə xüsusi təşəkkürümüzü bildiririk.

İnanırıq ki, belə tədbirlər İsmayıllının ictimai və mədəni həyatına rəng qatmaqla yanaşı, rayonumuzun turizm potensialının daha geniş tanıdılmasına da xidmət edəcək.

Gəraybəyli kənd körpələr evi - uşaq bağçası kollektivinin asudə vaxtını və istirahətini səmərəli təşkil etmək məqsədilə Şəki şəhərinə ekskursiyası təşkil olunmuşdur.

ETİHİ İsmayıllı Raypn Komitəsinin üzv təşkilatı Gəraybəyli kənd körpələr evi - uşaq bağçası kollektivinin asudə vaxtını və istirahətini səmərəli təşkil etmək məqsədilə Şəki şəhərinə ekskursiyası təşkil olunmuşdur. 

İttifaq üzvləri şəhərin tarixi, mədəni abidələrini ziyarət edərək yeni turizm məkanları ilə tanış olmuşlar. Təhsil işçiləri asudə vaxtını və istirahətini səmərəli təşkil olunmasına dəstək göstərdiyinə görə Elm və Təhsil İşçiləri Həmkarlar İttifaqı Respublika Komitəsinə öz minnətdarlığını və təşəkkürlərini bildirdilər.

ETİHİ İsmayıllı Rayon Komitəsinin üzv təşkilatı İsti su kənd tam orta ümumtəhsil məktəbin kollektiv üzvlərinin tədris ilinin sonunda asudə vaxtını və istirahətini səmərəli keçirtmək məqsədilə qədim Şuşa şəhərinə ekskursiyası təşkil olunmuşdur.

ETİHİ İsmayıllı Rayon Komitəsinin üzv təşkilatı İsti su kənd tam orta ümumtəhsil məktəbin kollektiv üzvlərinin tədris ilinin sonunda asudə vaxtını və istirahətini səmərəli keçirtmək məqsədilə qədim Şuşa şəhərinə ekskursiyası təşkil olunmuşdur. 

Təhsil işçiləri işğaldan azad olunmuş Qarabağ torpaqlarını , Şuşada tarixi, mədəni abidələri, Cıdır düzündə Milli Ordu əsgərlərin döyüşdüyü qayalıqları ziyarət edərək şəhidlərin ruhunu yad etmişlər. Yol boyu düşmən tapdağından azad olunmuş torpaqlarda aparılan quruculuq abadlıq işlərilə tanış olan ittifaq üzvləri qürür hissi ilə gözəl bir gün keçirdiklərini bildirdilər. 

Təhsil işçiləri Qarabağ bölgəsinə təşkil olunmuş bu ekskursiyaya dəstək göstərdiyinə görə Elm və Təhsil İşçiləri Həmkarlar İttifaqı Respublika Komitəsinə öz minnətdarlıqlarını və təşəkkürlərini bildirdilər.

“Dəyərlərimizi ötürək” adlı tədbir keçirilib.

Ailə, Qadın və Uşaq Problemləri üzrə Dövlət Komitəsinin tabeliyində olan İsmayıllı Uşaq və Ailələrə Dəstək Mərkəzinin və İsmayıllı Rayon İcra Hakimiyyətinin, Uşaq Səfirlər Məclisinin İsmayıllı rayon üzrə fəallarının və ETİHİ İsmayıllı Rayon Komitəsinin üzv təşkilatlarının birgə təşkilatçılığı ilə 30 iyul 2026-cı il tarixində mərkəzdə Milli Məclisin deputatı, Azərbaycan Qızıl Aypara Cəmiyyətinin sədri Novruzəli Aslanov və Əməkdar İncəsənət xadimi, şair Baba Vəziroğlunun iştirakı ilə “Dəyərlərimizi ötürək” adlı tədbir keçirilib.

Tədbirdə İsmayıllı Rayon İcra Hakimiyyətinin və Mərkəzin əməkdaşları, Uşaq Səfirlər Məclisinin İsmayıllı rayon üzrə fəalları və ictimaiyyət nümayəndələri iştirak ediblər.

​Tədbirin əsas məqsədi ailə institutunun möhkəmləndirilməsi, milli-mənəvi və ailə dəyərlərinin gənc nəslə ötürülməsi, sağlam ailə münasibətlərinin formalaşdırılması, ailədaxili qarşılıqlı hörmət, sevgi, məsuliyyət və birlik kimi dəyərlərin təbliği, həmçinin gənclərdə ailəyə bağlılıq və sağlam ailə modelinin formalaşdırılmasına dəstək olmaq idi.

Tədbirdə çıxış edən Novruzəli Aslanov və Baba Vəziroğlu ailənin cəmiyyətin əsas dayağı olduğunu vurğulayaraq, ailə dəyərlərinin qorunmasının və gələcək nəsillərə ötürülməsinin əhəmiyyətindən bəhs ediblər.

İştirakçı gənclər tərəfindən mövzu ilə bağlı qonaqlara müxtəlif suallar ünvanlanıb və onları maraqlandıran məsələlər ətrafında fikir mübadiləsi aparılıb.

Tədbirin bədii hissəsində Heydər Əliyev adına İsmayıllı şəhər Mədəniyyət Mərkəzi “Niyal” xalq ansamblının solisti Teymur Əziz və məktəblilər Baba Vəziroğlunun qələmə aldığı şeirləri və Novruz Aslanın bəstələdiyi mahnıları böyük həvəslə səsləndiriblər, eyni zamanda ailə və vətən sevgisini tərənnüm edən musiqi nömrələri ilə çıxış ediblər. Tədbirdə 60 nəfər iştirak edib.

Sonda qonaqlarla xatirə şəkli çəkilib.

Bu gün ETİHİ İsmayıllı Rayon Komitəsinin üzv təşkilatı şəhər 3 saylı körpələr evi- uşaq bağçasında tərbiyəçi müəllim Babayeva Gülxanım Ərzuman qızının çalışmanın son yaş həddi 65 yubiley yaşının tamam olması münasibətilə tədbir keçirildi.

Bu gün ETİHİ İsmayıllı Rayon Komitəsinin üzv təşkilatı şəhər 3 saylı körpələr evi- uşaq bağçasında tərbiyəçi müəllim Babayeva Gülxanım Ərzuman qızının çalışmanın son yaş həddi 65 yubiley yaşının tamam olması münasibətilə tədbir keçirildi. 

Tədbirdə DŞRTİ İsmayıllı Rayon Sektorunun müdiri Rəşid Məmmədli, ETİHİ Rayon Komitəsinin sədri Hafiz Kərimov , kollektiv üzvləri və valideynlər iştirak etdilər.İştirak edən qonaqlar və iş yoldaşları yubilyar haqqında xoş xatirələrini və təbriklərini bildirdilər.Qeyd olundu ki, bu gün həm duyğulu, həm də qürurverici bir gündür.

Uzun illər ərzində göstərdiyiniz zəhmət, uşaqlara bəxş etdiyiniz sevgi, qayğı və fədəkarlıq hər zaman minnətdarlıqla xatırlanacaqdır.Gülxanım müəllimə təkcə uşaqlara bilik və tərbiyə vermədi, həm də onların qəlbində sevgi, mehribanlıq və insanlıq toxumlarını səpdi, yüzlərlə ailənin və uşağın həyatında gözəl izlər buraxdı. 

Bunu bu gün Gülxanım müəllimənin təbrikinə gələn illərlə yetişdirdiyi, tərbiyə verdiyi uşaqların simalarından görmək olardı.

 Gülxanım Babayeva uzun illər səmərəli pedaqoji fəailiyyətinə və yubiley yaşının tamam olması münasibətilə Elm və Təhsil İşçiləri Həmkarlar İttifaqı İsmayıllı Rayon Komitəsinin fəxri fərmanı və qiymətli hədiyyəsi ilə mükafatlandırıldı.

 Gülxanım müəlliməni yubiley yaşının tamam olması münasibətilə rayonun təhsil ictimaiyyəti adından təbrik edirik, ona sağlam ömür və xoş istirahət arzulayırıq.

Bu gün ETİHİ İsmayıllı Rayon Komitəsinin üzv təşkilatı E.Məmmədov adına şəhər 3 saylı məktəb liseydə çalışmanın son yaş həddinə çatmış texniki işçi Daşdıyeva Validənin 65 illik yubiley tədbiri keçirilmişdir.

Bu gün ETİHİ İsmayıllı Rayon Komitəsinin üzv təşkilatı E.Məmmədov adına şəhər 3 saylı məktəb liseydə çalışmanın son yaş həddinə çatmış texniki işçi Daşdıyeva Validənin 65 illik yubiley tədbiri keçirilmişdir. 

Tədbirdə ETİHİ Rayon Komitəsinin üzvü , ilk həmkarlar təşkilatının sədri Çingiz Muradlı , liseyin direktoru Vasif Abdullayev və texniki heyyət iştirak ediblər. Yubılyar haqqında çıxış edən natiqlər Validə xanımın işinə çox məsuliyyətlə yanaşdığını və öz səmimiliyi ilə kollektivin dərin hörmətini qazandığını vurğulayıblar. 

Qeyd olundu ki, Validə Daşdıyevə ömrünün çox hissəsini məktəbin təmizliyinə, səliqə sahmanına sərf edərək həm müəllimlərin iş və əmək şəraitinin yaxşılaşdırılmasına, həm də şagirdlərin normal təhsil alması üçün təmiz və səliqəli sinif otaqlarının saxlanılması üçün böyük zəhmət sərf eləmişdir. O həm də səmimi, gülərüz , mehriban xarakteri ilə bütün kollektivin hörmətini qazanmışdır. Sonda yubilyar Elm və Təhsil İşçiləri Həmkarıar İttifaqı İsmayıllı Rayon Komitəsinin fəxri fərmanı və qiymətli hədiyyəsi ilə mükafatlandırılmışdır. 

 Liseyin texniki işçisi Validə Daşdıyevanı 65 yubiley yaşının tamam olması münasibətilə bütün təhsil ictimaiyyəti adından təbrik edir, ona sağlam ömür və xoş istirahət arzulayırıq.

Xəlilli lənd tam orta məktəbin kollektiv üzvlərinin asudə vaxtlarını və istirahətini səmərəli təşkil etmək məqsədilə Qəbələ və Şəki şəhərlərinə ekskursiyası təşkil edilmişdir.

ETİHİ İsmayıllı Rayon Komitəsinin üzv təşkilatı Xəlilli lənd tam orta məktəbin kollektiv üzvlərinin asudə vaxtlarını və istirahətini səmərəli təşkil etmək məqsədilə Qəbələ və Şəki şəhərlərinə ekskursiyası təşkil edilmişdir.İttifaq üzvıəri gərgin keçən tədris ilindən sonra tarixi yerləri və yeni turizm məkənlarını ziyarət edərək səmərəli istirahət etdilər. Təhsil işçiləri ekskursiyanın təşkilində onlara göstərilən dəstəyə görə Elm və Təhsil İşçiləri Həmkarlar İttifaqı Respublika Komitəsinə öz təşəkkürünü və minnətdarlıqlarını bildiriblər.

Ailə, Qadın və Uşaq Problemləri üzrə Dövlət Komitəsinin tabeliyində olan İsmayıllı Uşaq və Ailələrə Dəstək Mərkəzinin təşkilatçılığı ilə 22 İyul - Milli Mətbuat Günü münasibətilə media nümayəndələri, Mərkəzin ekspert qrupunun üzvləri, sosial tərəfdaşlar və Uşaq Səfirlər Məclisinin rayon üzrə nümayəndələrinin iştirakı ilə 22 iyul 2026-cı il tarixində görüş keçirilib.

ETİHİ İsmayıllı Rayon Komitəsi Ailə, Qadın və Uşaq Problemləri üzrə Dövlət Komitəsinin tabeliyində olan İsmayıllı Uşaq və Ailələrə Dəstək Mərkəzinin təşkilatçılığı ilə 22 İyul - Milli Mətbuat Günü münasibətilə media nümayəndələri, Mərkəzin ekspert qrupunun üzvləri, sosial tərəfdaşlar və Uşaq Səfirlər Məclisinin rayon üzrə nümayəndələrinin iştirakı ilə 22 iyul 2026-cı il tarixində görüş keçirilib.

Mərkəzin direktoru Lətifə Əliyeva giriş sözü ilə çıxış edərək mətbuatın cəmiyyətlə dövlət qurumları arasında informasiya körpüsü rolu oynadığını qeyd edib. O, bildirib ki, ailə, qadın və uşaq məsələləri sahəsində həyata keçirilən layihələrin, maarifləndirici tədbirlərin, xidmətlərin, ailələrə göstərilən dəstəyin geniş ictimaiyyətə çatdırılmasında medianın xüsusi çəkisi vardır. O, çıxışında ekspert qrupunun üzvləri, sosial tərəfdaşlar və uşaq səfirləri ilə birgə həyata keçirilən tədbirlər, layihələr, sosial aksiyalar və digər təşəbbüslərin əhəmiyyətini vurğulayaraq, bütün tərəfdaşlara göstərdikləri dəstəyə görə dərin təşəkkürünü bildirib və gələcəkdə bu əməkdaşlığın daha da geniş şəkildə davam etdirilməsini arzulayıb.

Tədbirdə çıxış edənlər kütləvi informasiya vasitələrinin ailə dəyərlərinin təbliği, sağlam həyat tərzinin təşviqi, uşaqların hüquqlarının müdafiəsi, erkən evlilik, məişət zorakılığı və digər sosial mövzular üzrə maarifləndirmə işlərinin daha geniş auditoriyaya çatdırılmasına mühüm töhfə verdiyini vurğulayıblar.

Tədbir zamanı sosial pedaqoq Rəsul Rəhimli tərəfindən Uşaq və Ailələrə Dəstək Mərkəzinin fəaliyyətini əks etdirən təqdimat nümayiş olunub. Təqdimatda ailələrlə aparılan işlər, maarifləndirici tədbirlər, psixoloji və sosial xidmətlər, mediativ fəaliyyət, layihələr və əldə olunan nəticələr iştirakçıların diqqətinə çatdırılıb.

Çıxış edən ETİHİ Rayon Komitəsinin sədri mətbuat işçilərinin rayon komitəsi ilə sıx əməkdaşlıq şəraitində işlədiyini , təhsil sahəsində keçirilən bütün mədəni kütləvi tədbirləri mətbuatda işıqlandırılmasına geniş şərait yaradıldığını bildirdi. 

Sonda tədbir iştirakçılarına Mərkəzlə səmərəli əməkdaşlıqlarına görə təşəkkürnamə və hədiyyələr, həmçinin bir qrup mətbuat işçilərinə Elm və Təhsil İşçiləri Həmkarlar İttifaqı Rayon Komitəsinin təşəkkürnaməsi və qiymətli hədiyyələri təqdim olunmuşdur.